Presidenti i SHBA-së, Donald Trump, ka paralajmëruar Bashkimin Evropian se ka afat deri më 4 korrik për të përmbushur angazhimet e marrëveshjes tregtare të arritur vitin e kaluar në Turnberry, Skoci. Në një postim në platformën Truth Social, Trump deklaroi:
“Kam pritur me durim që BE-ja të përmbushë pjesën e saj të marrëveshjes historike tregtare që arritëm në Turnberry të Skocisë, marrëveshja më e madhe tregtare në histori. Pajtova t’u jap atyre një afat deri në 250-vjetorin e vendit tonë. Përndryshe, për fat të keq, tarifat kundër saj do të rriten menjëherë në nivele shumë më të larta.”
Gjatë një telefonate me presidenten e Komisionit Evropian, Ursula von der Leyen, Trump tha se diskutuan edhe mbi çështjen e Iranit:
“Diskutuam për shumë tema, përfshirë unitetin tonë të plotë në bindjen se Irani nuk mund të ketë kurrë armë bërthamore. Një regjim që vret popullin e vet nuk mund të kontrollojë një bombë të aftë të vrasë miliona njerëz.”
Nga ana e saj, Ursula von der Leyen ka reaguar duke theksuar se “një marrëveshje është një marrëveshje” dhe se BE-ja është e përgatitur për çdo skenar, duke paralajmëruar masa kundërpërgjigjeje nëse SHBA shkel marrëveshjen ekzistuese.
Ultimatumi i Trump shihet si një kërcënim i drejtpërdrejtë ndaj Evropës, duke rrezikuar përshkallëzimin e një lufte tregtare mes dy blloqeve më të mëdha ekonomike në botë.
