Ambasadorja e SHBA në Tiranë, Yuri Kim, ka reaguar për zgjedhjet e pjesshme lokale, që po zhvillohen sot në gjashtë bashki të vendit, teksa thekson se ndërkombëtarët po vëzhgojnë procesin.
Kryediplomatja amerikane iu bën thirrje zyrtarëve shqiptarë të sigurojnë që votuesit të mund të shprehin lirisht vullnetin e tyre, pa asnjë trysni, blerje votash ose pengesa të tjera
“Stafi i Ambasadës së SHBA po vëzhgon votimin në të gjashtë bashkitë. Kam kënaqësinë të jem në #Durrës. Është veçanërisht e mrekullueshme të shohësh kaq shumë të rinj aktivë sot, qofshin votues, komisionerë zgjedhorë apo vëzhgues. Shpresoj që të gjithë qytetarët ta ushtrojnë të drejtën e tyre të votës. Është e rëndësishme që zyrtarët të sigurojnë që votuesit të mund të shprehin lirisht vullnetin e tyre, pa asnjë trysni, blerje votash ose pengesa të tjera”, shkruan ambasadorja Kim.
Ambasadorja amerikane ka inspektuar sot disa nga qendrat e votimit në Durrës.
E pyetur nga gazetarët për të dhënë një vlerësim mbi procesin e deritanishëm, Kim ka bërë thirrje për pjesëmarrje në votime.
“Është e drejta e juaj për të votuar dhe përgjegjësia juaj. Kështu që votoni”, ka thënë Kim.
Kim ka qenë e pranishme në disa Qendra Votimi në Durrës dhe ka ndjekur nga afër procesin e votimit.
