Roma e trajnerit Zhoze Murinjo ka nisur të “ndezë” edhe në kampionat, ku me fitoren 1-4 në transfertë ndaj Kaljarit, kryeqytetasit duket se po i japin fund krizës së rezultateve në Serinë A.
Golin e parë Roma e shënoi në minutën e 19 me Aouar dhe një minutë më pas Lukaku dyfishoi shifrat. Në minutën e 40, Dibala doli i dëmtuar nga fusha dhe në vend të tij hyri Andrea Beloti. Pjesa e parë u mbyll në shifrat 0-2. Edhe pjesa e dytë nisi nën diktatin e Romës, që në minutën e 51 Beloti trefishoi rezultatin.
Tetë minuta më vonë ishte radha e Romelu Lukakut që realizoi golin e dytë personal dhe të katërtin për Romën.
Në minutën e 87 nga pika e bardhë e penalltisë, Kaljari shënoi golin e nderit me Nandez. Me këtë fitore, Roma shkon në kuotën e 11 pikëve në tetë javë kampionat duke u ngjitur në vendin e 10.
