Reali i Madridit nuk bën Realin. “Los Blancos” barazuan pa gola ndaj Rajo Vajekanos në La Liga, në takimin e mbajtur në “Santiago Bernabeu”.
Kjo pikë bën që ekipi i Ançelotit të jetë në vendin e dytë me 29 pikë, 2 pikë më pak se Xhirona kryesuese dhe 2 pikë më shumë se Barcelona e vendit të 3.
Te Rajo ky barazim qendron mirë. Aktualisht, ekipi e sheh veten në mesin e tabelës dhe nëse vazhdohet me këtë ritëm, qendrimi në elitë mund të sigurohet më shpejt nga çfarë pritej.
Sa i takon ndeshjes, Reali i Madridit i bëri të gjitha si duhet, përveç finalizimit. Dyshja Vinisius-Hozelu në ofensivë nuk prodhoi rezultat, ndërsa as Belingham pas shpinës së tyre nuk ishte në natën e tij më të mirë.
Përsa i përket Ivan Balliut, ky i fundit nuk ishte as në stol në ndeshjen e sotme. Kujtojmë që mbrojtësi shqiptar u zëvendësua në minutën e 70 në ndeshjen përballë Real Sociedadit e zhvilluar më 29 tetor. Ai nuk ishte pjesë e ekipit as në ndeshjen e Kupës së Mbretit që Vajekano luajti kundër Atletiko Luganos. Nuk dihet nëse problemet fizike janë afatgjatë apo jo.
