Ambasadori i Shteteve të Bashkuara të Amerikës në Tiranë, Eric Wendt, i shoqëruar nga dy senatorët amerikanë, Jeanne Shaheen dhe Dick Durbin, ka zhvilluar një sërë takimesh gjatë vizitës së tyre në Shqipëri. Në fokus të agjendës amerikane kanë qenë bashkëpunimi mes dy vendeve, forcimi i institucioneve të drejtësisë dhe lufta kundër krimit të organizuar.
Gjatë qëndrimit në Tiranë, përfaqësuesit amerikanë janë takuar me deputetët e opozitës, Oerd Bylykbashi, Jorida Tabaku dhe Ivi Kaso, si dhe me përfaqësues të partive të tjera politike. Në këto takime janë diskutuar zhvillimet politike në vend dhe çështje që lidhen me funksionimin e institucioneve demokratike.
Ajo që ka tërhequr vëmendjen është mungesa e kreut të Partisë Demokratike, Sali Berisha, në takimet e zhvilluara me delegacionin amerikan. Berisha është shpallur “non grata” nga SHBA, ndërsa takimet e zhvilluara gjatë kësaj vizite kanë ngjallur interes për mesazhet politike që përcjellin.
Një tjetër ndalesë e rëndësishme e delegacionit amerikan ishte Prokuroria e Posaçme kundër Korrupsionit dhe Krimit të Organizuar (SPAK), ku Eric Wendt, Jeanne Shaheen dhe Dick Durbin u takuan me kreun e institucionit, Klodian Braho, si dhe me drejtuesin e Byrosë Kombëtare të Hetimit (BKH), Joni Keta.
Në qendër të bashkëpunimit mes Shqipërisë dhe SHBA-së janë lufta kundër korrupsionit, goditja e pastrimit të parave, lufta kundër krimit të organizuar dhe çmontimi i rrjeteve e karteleve të trafikut të drogës. Një rëndësi të veçantë ka edhe bashkëpunimi mes institucioneve ligjzbatuese për të hetuar rrjetet kriminale që veprojnë përtej kufijve.
Vizita e senatorëve amerikanë dhe takimet me drejtuesit e institucioneve të drejtësisë vijnë në një moment kur forcimi i shtetit të së drejtës dhe lufta kundër korrupsionit mbeten çështje me rëndësi për Shqipërinë dhe marrëdhëniet e saj me Shtetet e Bashkuara.
