“Lista e zezë” me pushtetarë të lartë të korruptuar nga SHBA, pritet të zgjerohet. Shtetet e Bashkuara të Amerikës duken të vendosura dhe premtojnë se nuk do ndalen deri sa politika shqiptare të pastrohet nga të korruptuarit dhe të inkriminuarit përmes mekanizmit të shpalljes “non grata”, por jo vetëm kaq pasi SHBA po përgatit goditje të reja. Shumë shpejt, ministra të qeverisë së drejtuar nga kryeministri Edi Rama, do të shpallen “non grata” nga Shtetet e Bashkuara të Amerikës. Paralajmërimin e bujshëm për politikën shqiptare e ka dhënë deputeti i Partisë Demokratike Kreshnik Çollaku. Në një intervistë televizive, Çollaku u shpreh ditën e djeshme se deklaratën e tij e bazon në disa informacione që ka marrë, por edhe duke analizuar ngjarjet politike. “Mendoj se valës goditëse të kësaj qasjeje të politikës amerikane në Ballkan, nuk do t’i shpëtojë dhe nuk i ka shpëtuar as qeveria dhe mazhoranca. Unë mendoj që “non gratat” kanë trokitur edhe në dyert e mazhorancës. Nuk e di nëse kanë mbërritur, por e sigurt është që shpejt do të trokasin në derën e qeverisë dhe të mazhorancës. Nga analiza dhe disa informacione të cilat nuk mund t’i bëj publike. Do të goditet edhe mazhoranca edhe qeveria me “non grata”. Kësaj vale goditëse nuk do t’i shpëtojë askush”, theksoi ai. Sinjalet e qarta se SHBA do të shpallë persona të tjerë “non grata” i dha pak javë më parë dhe ambasadorja Yuri Kim, e cila tha se zyrtarët e lartë nuk po i zë gjumi, pasi janë në frikë se kush e ka radhën. Shtetet e Bashkuara të Amerikës kanë futur në listën e tyre të zezë gjashtë persona të rëndësishëm në Shqipëri. “Non-grata” nga Departamenti Amerikan i Shtetit janë shpallur, Sali Berisha, Adriatik Llalla, Tom Doshi, Vangjush Dako, Aqif Rakipi dhe Ylli Ndroqi. Këtyre personave iu ndalohet hyrja në SHBA, edhe familjarëve të tyre.
Lista dhe arsyet
Sali Berisha (19 maj 2021) ‘Në cilësinë e tij zyrtare si Kryeministër i Shqipërisë në veçanti, Berisha ishte i përfshirë në veprime korruptive, të tilla si shpërdorim i fondeve publike dhe ndërhyrje në proceset publike, duke përfshirë përdorimin e pushtetit të tij për përfitimet e tij dhe për të pasuruar aleatët e tij politikë dhe anëtarët e familjes së tij në shpenzimet e besimit të publikut shqiptar në institucionet e tyre qeveritare dhe zyrtarët publikë. Ky emërim është bërë nën Seksionin 7031 (c) të Departamentit të Shtetit, Operacionet e Jashtme, dhe Programeve të Ndarjeve të Programeve Akti i Ndarjes, 2021. Përveç Berishës, unë po caktoj publikisht bashkëshorten e tij, Liri Berishën, djalin e tij, Shkëlzen Berisha dhe vajza, Argita Berisha Malltezi. Këta individë nuk janë të përshtatshëm për të udhëtuar në Shtetet e Bashkuara.
Adriatik Llalla (15 shkurt 2018)
“Sekretari i Shtetit Rex Tillerson ka shpallur publikisht “non grata” ish-Prokurorin e Përgjithshëm Shqiptare (z.) Adriatik Llalla në bazë të nenit 7031 (c) të Ligjit për Buxhetin e Konsoliduar të FY 2017 për shkak të përfshirjes së tij në korrupsion të rëndësishëm. Neni 7031 (c) parasheh që në rastet kur Sekretari i Shtetit ka informacion të besueshëm se zyrtarët e huaj janë përfshirë në korrupsion të rëndësishëm ose në shkelje të rënda të të drejtave të njeriut, këta individë dhe anëtarët e tyre të afërt të familjes nuk kanë të drejtë të hyjnë në Shtetet e Bashkuara. Ligji gjithashtu kërkon që Sekretari i Shtetit të caktojë publikisht ose privatisht zyrtarë të tillë dhe anëtarët e familjes së tyre si të padëshiruar. Sekretari po ashtu shpall publikisht bashkëshortin e z. Llalla, Ardjana Llalla, vajzën e tij, Eni Llalla dhe fëmija tjetër i tij, jo amerikan.”
Tom Doshi (16 prill 2018)
“Departamenti njofton publikisht deputetin shqiptar Tom Doshi sipas nenit 7031 (c) të Ligjit të Përvetësimeve të Konsoliduara të vitit 2017, për shkak të përfshirjes së tij në korrupsion të rëndësishëm. Neni 7031 (c) parasheh që në rastet kur Sekretari i Shtetit ka informacione të besueshme se zyrtarët e huaj janë përfshirë në korrupsion madhor ose shkelje të rënda të të drejtave të njeriut, këta individë dhe anëtarët e tyre të afërt të familjes nuk kanë të drejtë të hyjnë në Shtetet e Bashkuara”, thuhet në njoftimin e DASH në Tëitter.”
Vangjush Dako (31 korrik 2019)
“Emërtim publik për shkak të përfshirjes në korrupsion të rëndësishëm të Vangjush Dakos, kryetar i bashkisë së Durrësit në Shqipëri. Sekretari i Shtetit po e përcakton publikisht kryetarin e bashkisë së Durrësit në Shqipëri Vangjush Dako, sipas Seksionit 7031(c) të Departamentit të Shtetit FY 2019. Seksioni 7031 (c) parashikon që, në rastet kur Sekretari i Shtetit ka informacion të besueshëm se zyrtarë të huaj kanë qenë të përfshirë në një korrupsion të konsiderueshëm ose një shkelje të madhe të të drejtave të njeriut, ata individë dhe anëtarët e tyre të ngushtë të familjes nuk kanë të drejtë për hyrje në Shtetet e Bashkuara.”
Aqif Rakipi (11 prill 2022)
“Aqif Rakipi është një ish-deputet nga Elbasani i Shqipërisë, i cili ka një ndikim të dëmshëm dhe destabilizues në proceset politike në Shqipëri. Grupe të shumta të krimit të organizuar (OCG) në Shqipëri kanë ofruar para, dhurata ose premtime për vende pune ose koncesione në këmbim të votave për partinë e tyre të preferuar politike. Rakipi ka qenë prej kohësh i përfshirë në krimin e organizuar dhe është i lidhur ngushtë me një OCG, brenda së cilës ai ka ushtruar ndikim politik, duke përfshirë edhe korrupsionin. Për shembull, Rakipi ka përdorur ndikimin e tij politik për të emëruar miqtë e tij në postet kryesore publike në Elbasan dhe Tiranë.
Ylli Ndroqi (11 prill 2022)
“Ylli Ndroqi është një pronar mediash, pasuritë e të cilit janë sekuestruar nga qeveria shqiptare në vitet 2020 dhe 2021 për veprimtari të mëparshme kriminale. Ndroqi ka shfrytëzuar mediat e dikurshme nën kontrollin e tij për të zhvatur dhe shantazhuar qytetarët shqiptarë nëpërmjet kërkesave për para dhe blerjeve reklamuese në këmbim të ndalimit të publikimit të historive negative në media. Gjithashtu, Ndroqi ka kërkuar ryshfet për llogari të një subjekti që kërkon të bëjë biznes në Shqipëri. Ndroqi caktohet në zbatim të E.O. 14033 për të qenë përgjegjës ose bashkëpunëtor në, ose për përfshirje të drejtpërdrejtë ose të tërthortë në korrupsion në Ballkanin Perëndimor, duke përfshirë korrupsionin të drejtpërdrejtë ose në emër të dikujt të lidhur me një qeveri”, thuhet në njoftim.
