Dashnor Sula ka sqaruar arsyet që e çuan të pranonte ftesën e Kryeministrit Edi Rama për detyrën e Kryeinspektorit. Ish-deputeti i Partisë Demokratike deklaroi se vendimi lidhet me përgjegjësinë për të ushtruar një funksion institucional dhe jo me pozicionim politik. Ai tha se e konsideron këtë rol një sfidë profesionale dhe shtoi se synon të përqendrohet te zbatimi i ligjit dhe standardeve në detyrën e re.
Sula komentoi një intervistë në Top Channel edhe reagimet që kanë ardhur nga kryetari i PD, Sali Berisha. Ai shmangu përplasjen direkte, duke theksuar se e ka lënë pas të shkuarën politike dhe se aktualisht është i fokusuar te përgjegjësitë e funksionit që mban.
Gazetarja: Zoti. Sula ju vini nga një karrierë e gjatë politike 20 vite në logon e PD, nga një zë kritikues tashmë do të jeni bashkëpunëtor me mazhorancën. Si e pranuat ftesën e Kryeministrit Edi Rama?
Dashnor Sula: Dhunshëm u përzura dhe nuk kisha asnjë të ardhme që të përfshihesha për të dhënë këtë kontribut. Z.Rama më hodhi dorashkën dhe më paraqiti sfidën për të marrë pjesë në ndërtimin e një institucioni të shtetit shqiptar.
Gazetarja: A patët dilema për të pranuar detyrën e Kryeinspektorit pasi me reformën e re ju do të keni 17 inspektoriate për të menaxhuar. A mendoni se do të quheni tradhtar nga pala tjetër?
Dashnor Sula: Fillimisht e kisha të vështirë. Por më ka thënë z.Rama se qytetarët shqiptarë nuk janë vetëm socialistët, qytetarët shqiptarë janë edhe ata me bindje të tjera e demokratike. Dhe kostumin e politikanit unë e kam lënë në shtëpi dhe kam veshur kostumin e një nënpunësi të shtetit.
Gazetarja: Si ndodhi afrimi me Edi Ramën, pasi ju keni qenë kritikues ndaj njëri-tjetrit për një kohë të gjatë në Parlament?
Dashnor Sula: Unë kam konstatuar një veçori dhe atë e ka Edi Rama dhe rrallë një politikan tjetër në Shqipëri. Nëse do të gjeni një moment të vetëm që z.Rama është një person që i hyn në familje të politikanit tjetër. Nuk ka. Këtë cilësi e kam pas dhe unë në politikë.
Gazetarja: A mendoni që e tepruat kur thatë që e vlerësoni vizionin e Ramës?
Dashnor Sula: Nuk mund të mohohet që Edi Rama ka sfidë të fusë Shqipërinë në BE.
Gazetarja: Po reagimin e Berishës si e pritët ?
Dashnor Sula: Nuk do ja lejoja vetes dhe nuk do të ishte e moralshme që të vazhdoj të bëj komente politike.
Gazetraja: Tashmë ju keni marrë detyrën e Kryeinpektorit, cilat janë sfidat që ju janë caktuar?
Dashnor Sula: Të shkëputemi nga modeli që ka qenë përgjatë këtyre 35 viteve dhe shpresoj se deri në fund të vitit të kemi një sistem të digjitalizuar.
