Nga Rigels Seliman
Prej disa ditësh në skenën politike shqiptare është rikthyer në qendër të vëmendjes statusi “non-grata” i Sali Berishës, pas përhapjes së disa lajmeve se ai mund të udhëtojë drejt Shteteve të Bashkuara të Amerikës. Por ky pretendim ka krijuar më shumë konfuzion sesa qartësi, pasi e vërteta mbetet e pandryshuar: statusi “non-grata” nuk është hequr dhe Berisha vazhdon të jetë i padëshiruar në SHBA. Kjo çështje, e shoqëruar me një interpretim të manipuluar të një përgjigjeje të Departamentit Amerikan të Shtetit, po shfrytëzohet si një mjet propagandistik për të mashtruar elektoratin dhe për të krijuar iluzionin e një rehabilitimi të mundshëm ndërkombëtar.
Në realitet, leja e mundshme për të udhëtuar për raste të veçanta diplomatike nuk ka asnjë lidhje me heqjen e statusit “non-grata”. Ky është një dallim thelbësor që po manipulohet qëllimisht nga struktura të caktuara për të shpërndarë konfuzion dhe për të ruajtur imazhin e një lideri që në fakt është nën akuza serioze për korrupsion. Në vend që të sqarohen opinionet dhe të tregohen fakte, kemi një përpjekje për të ndikuar emocionalisht mbi mbështetësit e tij dhe për të krijuar përshtypjen e një “fitoreje” politike që nuk ekziston.
Ndërkohë, përfituesit e vërtetë të kësaj situate janë ata që synojnë të ruajnë status quo-në në politikën shqiptare. Duke e mbajtur Berishën si figurë qendrore, polarizimi politik zgjatet dhe reforma reale pengohet. Më shumë sesa një garë për qeverisje, kjo bëhet një garë për mbijetesë politike të individëve të diskredituar. E gjitha kjo ndodh në dëm të interesit publik, që ka nevojë për transparencë, drejtësi dhe një klasë politike të përgjegjshme.
Në një shoqëri që pretendon të jetë demokratike dhe europiane, nuk mund të mbështetet një lider politik që nuk gëzon më as minimumin e besueshmërisë ndërkombëtare. Zgjedhjet e 11 majit dhe reflektimi pas tyre duhet të shërbejnë si një moment ndarjeje nga mitet dhe rikthim te realiteti. Statusi “non-grata” nuk është një pengesë administrative, por një mesazh politik që nuk duhet të injorohet apo relativizohet. Ai është një tregues i qartë për përgjegjësi të papërballuara dhe për një të kaluar që nuk mund të ndërtohet e ardhmja.
