Reali i Madridit ka dhuruar spektakël në “Santiago Bernabeu”, duke mposhtur me rezultatin e thellë 4-1 Real Sociedadin, në ndeshjen e prapambetur të javës së parë të La Liga-s.
Protagonisti absolut i mbrëmjes ishte Kilian Mbape, i cili realizoi një tregolësh dhe udhëhoqi “Los Blancos” drejt një fitoreje bindëse.
Francezi zhbllokoi sfidën në minutën e 40-të, pas një asistimi fantastik nga Federiko Valverdes. Ky ishte goli i parë i Mbapesë në këtë sezon të ri të La Liga-s.
Megjithatë, Sociedadi reagoi menjëherë. Në minutën e 44-t, Luka Suçiç përfitoi nga një aksion i mirë i baskëve dhe mposhti Tibo Kurtua për të vendosur baraspeshën.
Pjesa e parë u mbyll në shifrat 1-1, por në fraksionin e dytë Reali ndryshoi marsh dhe mori kontrollin e plotë të ndeshjes.
Në minutën e 60-të, Mbape realizoi golin e dytë personal pas një kombinimi të shkëlqyer me Jude Belingam, duke rikthyer avantazhin e madrilenëve.
Vetëm tetë minuta më vonë, ishte radha e Vinicius Zhunior për të festuar. Braziliani shënoi golin e tij të parë për këtë sezon në La Liga, ndërsa asistimi erdhi sërish nga Xhud Belingam.
Spektakli u kompletua në minutën e 80-të. Mbape shënoi edhe golin e tretë personal, këtë herë pas asistimit të Vinicius Zhunior, duke vulosur fitoren 4-1 të Realit të Madridit.
Një mbrëmje perfekte për madrilenët dhe një nisje spektakolare për Mbapenë, i cili paralajmëron se këtë sezon synon të jetë sërish protagonist absolut në Spanjë.
