Rama fut bashkitë në “regjim” online dhe iu bën “dush” kryebashkiakëve, thirrje të largojnë të korruptuarit nga zyrat e shtetit dhe të investojnë më shumë për mjedisin

Kryeministri Edi Rama ka futur bashkitë në “regjim” online, ndërsa iu ka bërë dush kryebashkiakëve. E gjithë qeveria dhe kryebashkiakët socialistë janë mbledhur dje në Pogradec. Arsyeja është fitorja e vendoreve të 2023-it. Për ta arritur këtë, kryebashkiakët kanë shkuar në qytetin liqenor me dy dosje. E para që i është dorëzuar nga secili prej tyre kryesocialistit Edi Rama është ajo e punëve të bëra dhe ato të mbetura. Mbi këto të dhëna edhe Edi Rama bëri kritikat e tij. Për nga pastërtia vendin e parë vazhdon ta mbajë Lezha. Më shembullorja në shërbimet ndaj qytetarëve, veçmas pas tërmetit tragjik të tre viteve më parë, është Shijaku. Madje sipas Edi Ramës, kryebashkiaku i Shijakut është treguar më i zoti se ai i Tiranës dhe Durrësit.“Është bashki kampione. Ndërkohë që dy bashkitë e mëdha, e Tiranës dhe Durrësit, nga pikëpamja e funksionimit në këtë proces, kuptohet që kanë problematika të tjera, nuk diskutohet, por kanë çfarë të mësojnë nga bashkia e Shijakut”, tha ai. Në krye të listës së ankesave ndaj të zgjedhurve të tij Edi Rama kishte mosreagimin e kryebashkiakëve ndaj të korruptuarëve në administratat qendrore.“Nëse një drejtor i një institucioni të qeverisjes qendrore, në qytetin tënd lë kokrrën e namit dhe e mbron partia, deputetët, e mbrojnë ku e di unë se kush, ti duhet të çohesh dhe të thuash, o unë, o ky këtu, sepse i ka dalë boja, sepse flet i gjithë qyteti. Të jesh kryetar bashkie do të thotë t’i dalësh përballë e ti thuash: Ti nuk vazhdon dot më këtu, ti nuk je më drejtor hipoteke, ose drejtor sigurimesh shoqërore, ose poste. Pse nuk e di kryetari i bashkisë kur posta bën zullume me pensionistët. E di që çke me të, sepse kryetari i bashkisë i di të gjitha”, tha ai. Si detyrë të dytë pas pastrimit, kryesocialisti përcaktoi pajisjen e të gjithë hoteleve me sistemin e menaxhimit të ujërave të ndotura deri vitin e ardhshëm.“Si mund të lejojmë ne që kush hap një hotel të mos marrë masa që të jetë kontributor në pastërti, jo të jetë ndotës”, tha ai.