Presidenti amerikan Donald Trump ka njoftuar se negociatorët amerikanë, Steve Wittkof dhe Jared Kushner, janë nisur drejt kryeqytetit të Pakistanit, Islamabad, për të zhvilluar bisedimet e paqes.
Përmes një postimi në rrjetet sociale, Trump kërcënoi Iranin për pranimin e një marrëveshjeje përfundimtare, pasi në të kundërt sipas Presidentit amerikan, vendi do të përballej me sulme masive ndaj centraleve dhe urave.
Nga ana tjetër, Irani nuk ka vendosur ende nëse do të dërgojë një delegacion negociator në Islamabad për bisedime me Shtetet e Bashkuara dhe asnjë takim nuk do të zhvillohet për sa kohë mbetet në fuqi bllokada detare amerikane. Kështu raporton agjencia e lajmeve Tasnim, e lidhur me Korpusi i Gardës Revolucionare Islamike, duke cituar një burim të informuar. Lajmi është përcjellë edhe nga Iran International.
Këto zhvillime vijnë në një moment kur 21 prilli po afrohet dhe armëpushimi 2 javor në Lindjen e Mesme për lejimin e zhvillimit të negociatave po përfundon. Negociatat e para mes SHBA-së dhe Iranit dështuan ndërsa Kryetari i Parlamentit iranian Mohammad Baqer Ghalibaf thotë se një marrëveshje është larg, duke shprehur mosbesim ndaj amerikanëve.
“Ne duam paqe të qëndrueshme në mënyrë që lufta të mos ndodhë më kurrë“. Ai theksoi se Republika Islamike dhe Shtetet e Bashkuara kanë pikëpamje të ndryshme për disa çështje bërthamore dhe Ngushticën e Hormuzit. Ai shtoi se mbeten dallime në mendime për këto çështje, megjithëse “është bërë përparim“, por se një marrëveshje “mbetet e largët“.
Nëpërmjet një deklarate të presidentit iranian Masoud Pezeshkian, kuptohet se Irani do të vijojë të këmbëngulë në çështjen bërthamore në negociatat me SHBA-në.
“Trump thotë se Irani nuk mund të ushtrojë të drejtat e tij bërthamore, por nuk thotë pse do të ishte krim. Kush është ai që t’i mohojë të drejtat një kombi?”, ka thënë Pezeshkian.
Prej dje Ngushtica e Hormuzit u mbyll nga Irani që shtoi dhe prezencën në këtë rrugë ujore strategjike. Së fundmi Garda Revolucionare ka lëshuar një tjetër paralajmërim për goditjen e çdo anije që i afrohet Ngushticës.
Më herët, në përplasjet virtuale mes Papa Leone XIV dhe Donald Trump, është përfshirë dhe JD Vance, i cili përshëndeti deklaratën e Atit të Shenjtë, i cili tha se fjalimet e tij nuk duhen interpretuar “sikur po përpiqesha të ridebatoja Presidentin Trump, gjë që nuk është në interesin tim më të mirë“.
Zv/presidenti Vance tha se “I jam mirënjohës Papa Leone-s që e tha këtë. Ndërsa narrativa mediatike vazhdimisht nxit konfliktin – dhe po, ka pasur dhe do të ketë mosmarrëveshje të vërteta – realiteti është shpesh shumë më i ndërlikuar.“
