“El Clasico” flet për Barcelonën. Katalanasit kanë “bërë ligjin” në “Santiago Bernabeu”, duke mposhtur Realin e Madridit me rezultatin e pastër 0-4.
Katalanasit pllakosën mitikun “Bernabeu” në minutën e 54. Levandovski nuk fali pas asistit të Kasado.
2 minuta më vonë, Barcelona dyfishoi shifrat. Ishte sërish Levandovski, këtë herë me kokë, i lënë vetëm në qendër të zonës pas krosimit të Balde. Ky ishte goli i 14 për Levandovskin.
Në minutën e 77 të takimit, madrilenët shënuan kapitullimin e tyre. Talenti Lamin Jamal shënoi golin e tretë. Një realizim perfekt me të djathtën.
Në minutën e 84, Rafinja shënoi golin e katërt, duke turpëruar madrilenët në “Bernabeu”.
Ky ishte “El Clasico” numër 258 në historinë e këtyre dy superfuqive të futbollit spanjoll, pasi Reali ka fituar 105 takime, Barcelona 101, ndërsa 52 sfida janë mbyllur në barazim.
Me këtë fitore, Barcelona mban e vetme kreun me 30 pikë, ndërsa reali renditet në vendin e dytë me 24 pikë.
