Pas incidentit të një dite më parë në zonën e Zvërnecit, ku banorët u përplasën me roje private të një kompanie që pritet të zhvillojë një investim në zonë, kanë reaguar edhe drejtuesit e shtetit.
Kryeministri Edi Rama reagoi fillimisht duke theksuar se projekti në fjalë lidhet me një pronë tërësisht private dhe se nuk ka pasur asnjë dhënie apo falje toke nga shteti shqiptar. Ai nënvizoi se prona u është kthyer pronarëve dhe është regjistruar në hipotekë vite përpara ardhjes së qeverisë aktuale në pushtet.
Rama kritikoi ashpër sjelljen e rojeve private të përfshira në konflikt, duke e cilësuar të papranueshme përdorimin e forcës ndaj qytetarëve. Ai theksoi gjithashtu se çdo devijim nga standardet ligjore dhe etike duhet të trajtohet me përgjegjësinë përkatëse. Kryeministri la të kuptohet se do të flasë më gjerësisht për projektin dhe “të vërtetat dhe të pavërtetat” rreth tij në një dalje publike të paralajmëruar.
“Nesër e kam radhën unë për të folur për një projekt të jashtëzakonshëm për Shqipërinë, për të cilin punohet prej disa vitesh tanimë dhe i cili nuk ka asnjë lidhje me disa të pavërteta të mëdha, që janë hedhur në qarkullim ditët e fundit. Ndërkohë e përgëzoj lidershipin e Policisë së Shtetit për reagimin e shpejtë e të saktë, qoftë ndaj atij grushti muskujsh pa tru me statusin e rojeve private të sigurisë, qoftë ndaj drejtuesve vendorë të policisë së Vlorës. Qasja e re e tolerancës zero ndaj çdo uniforme blu që cënon besimin e publikut, është e duhura. *Për vetë projektin dhe të vërtetat e të pavërtetat rreth tij, më shumë nesër në 10.00. Live për të gjithë të interesuarit natyrisht.”, shkruan Rama.
Edhe Ministri i Punëve të Brendshme, Besfort Lamallari reagoi duke kërkuar ndjekje penale ndaj personave përgjegjës për dhunën dhe duke vënë në shënjestër edhe kompaninë e sigurisë, të cilën e cilësoi si të paaftë në ushtrimin e aktivitetit të saj, duke kërkuar që të mbyllet sa më parë. Ai gjithashtu kritikoi qëndrimin e Policisë së Vlorës gjatë ngjarjes, duke e konsideruar të pajustifikueshme indiferencën e saj.
Lamallari përshëndeti ndërkohë reagimin e Policisë së Shtetit për pezullimin e drejtuesve vendorë dhe nisjen e hetimeve në zinxhirin komandues, duke theksuar se çdo devijim nga detyrat e policisë do të goditet pa tolerim dhe se besimi i qytetarëve tek uniformat blu duhet të mbrohet në çdo rast.
