Kryeministri Edi Rama ka folur ditën e sotme në Podkastin e tij ‘Flasim’ për zhvendosjen e Kadastrës së Vlorës në Tiranë.
Rama tha se kjo zhvendosje e një drejtorie vendore në qendër nuk është as e para dhe nuk do të jetë as e fundit, pasi sipas tij, edhe në të ardhmen do të ketë zhvendosje të tjera.
Shefi i Ekzekutivit shtoi se shërbimet kadastrale sot merren online përmes platformës E-Albania dhe nuk është nevoja për t’u paraqitur fizikisht pranë zyrave.
“Dy fjalë për zhvendosjen e zyrës së Kadastrës së Vlorës në Tiranë. Edhe njëherë tjetër u ngatërrua qëllimisht adresa fizike e zyrës me shërbimin për qytetarët. Agjencia e Kadastrës ka kaluar prej kohësh nga një shërbim primitiv me sportele dhe radhë në një model shërbimesh online. Përmes platformës E-Albania ky model mundëson që shumica e procedurave kadastrale nuk ka nevojë për paraqitje fizike në zyra. Të gjitha aplikohen dhe ndiqen online edhe nga Amerika. E gjithë kjo zhurmë lidhet me një mendësi që duhet përmbysur. Ky nuk është i pari si veprim për zhvendosjen e një drejtorie vendore në qendër dhe nuk është as i fundit. Të tjera drejtori do të zhvendosen”, tha mes të tjerash Rama.
Po ashtu kryeministri Edi Rama deklaroi se janë shpallur të gjitha dëmshpërblimet për të prekurit nga zjarret e verës së vitit 2025, në 15 bashki të vendit. Sipas Ramës, e rëndësishme është që dëshmpërblimet të shkojnë atje ku duhet dhe që kushdo që është prekur nga zjarret, të marrë atë që i takon.
Shefi i Ekzekutivit foli edhe për buxhetin e Mbrojtjes 2026 për Shqipërinë, duke e cilësuar atë më të lartin dhe më seriozin në histori për vendin tonë. Rama shtoi se buxheti i Mbrojtjes 2026 e ka tejkaluar objektivin bazë prej 2% të Prodhimit të Brendshëm Bruto, të vendosur nga NATO për të gjitha vendet anëtare të aleancës.
