Kryeministri Edi Rama reagoi sot në lidhje me sulmet terroriste të tre viteve më parë në Izrael, ku jetët e të rinjve u morën nga errësira e urrejtjes dhe terrorit.
“Kanë kaluar tre vjet që nga tmerri i 7 tetorit. Por të gjithë duhet ta kuptojmë se, për familjet, të dashurit e të cilave u vranë nga kasapët e Hamasit, për ata, jeta e të cilëve u shkatërrua, dhe për të mbijetuarit që mbartin plagë që asnjë sy nuk mund t’i shohë, ai mëngjes nuk ka përfunduar kurrë”, u shpreh Rama në një reagim në rrjetet sociale.
Rama tha se në Nova, Izrael, heshtja flet më shumë se fjalët.
“Në fillim të këtij viti, qëndrova në Nova. Ka vende ku heshtja flet më fort se fjalët, dhe Nova është një prej tyre. Të rinj nga shumë vende ishin mbledhur atje për të kërcyer, për të qeshur dhe për të festuar jetën, por jetët e tyre u morën nga errësira e urrejtjes dhe terrorit.
Rama kujtoi në orën më të errët të Evropës, shqiptarët strehuan hebrenjtë nga Holokausti, duke rrezikuar gjithçka për të shpëtuar njerëz të dënuar me vdekje.
“Në Shqipëri kemi një fjalë që përmban një kod të tërë moral: Besa. Një premtim që nuk mund të thyhet. Në orën më të errët të Evropës, gjyshërit tanë e mbajtën atë premtim duke strehuar hebrenjtë nga Holokausti, duke rrezikuar gjithçka për të shpëtuar njerëz të dënuar me vdekje”, u shpreh Rama.
Sipas kryeministrit, “antisemitizmi nuk duhet të lejohet më kurrë të fshihet pas heshtjes, sloganeve apo justifikimeve”.
“Sot, kjo trashëgimi kërkon diçka nga ne. Kërkon që kujtesa të mos i dorëzohet kurrë indiferencës, që dhimbja të mos lihet kurrë në vetmi, që antisemitizmi të mos lejohet më kurrë të fshihet pas heshtjes, sloganeve apo justifikimeve dhe që t’u qëndrojmë besnikë miqve tanë edhe në orët e tyre më të errëta. Për çdo nënë, baba, fëmijë dhe familje që vajton sot: U preftë në paqe kujtimi i të dashurve tuaj dhe qoftë ai një bekim i përjetshëm”, shkruan kryeministri Rama.
Në sulmin terrorist të 7 tetorit 2023 gjatë festivalit muzikor Nova në Izrael u vranë më shumë se 1200 njerëz në Izraelin jugor dhe rreth 250 u morën peng në Rripin e Gazës.
