Kryeministri Edi Rama ka realizuar sot një takim me komunitetin e biznesit ku është zhvilluar një dialog i hapur lidhur me ‘Paqen Fiskale’.
Rama theksoi se nuk do të ketë paqe me ndërtuesit, pasi sipas tij është sektori që duhet të ketë maksimumin e përgjegjshmërisë.
Rama u ‘tërhoqi’ veshin ndërtuesve duke theksuar se janë sektori që shfryzojnë njerëzit më shumë se çdo sektor tjetër.
Kryeministri u bëri thirrje ndërtuesve të rrisin pagat e punonjësve dhe t’i deklarojnë.
“Paqe me ndërtuesit nuk ka, paqe me gjithë të tjerët po. Me keni mbrapa këmba këmbës, mua dhe të gjitha çfarë janë që varen nga unë. Paqe me ndërtuesit nuk ka dhe nuk ka për të pasur, sepse është sektori kryesor dhe duhet të performojë me maksimumin e përgjegjshmërisë.
Ju, që akoma deklaroi punonjës me 50 mijë lekë, ndërkohë që e dimë shumë mirë, që po të shkojmë të pyesim edhe peshqit e liqenit artificial do na e konfirmojnë se me këtë çmim nuk ka. Bëni deklarimet e duhura, paguani njerëzit, deklaroni ato paga. Ju jeni sektori me më shumë fitim në Shqipëri.
Ju duhet të na mbështesni ne, jo ne ju. Jeni sektori që shfrytëzoni njerëzit më shumë se në çdo sektor tjetër në Shqipëri. Shkundini mirë ato xhepa se i keni të fryra shumë. Paguani ato punonjësit, bëjuani rrogat 1500-2000 euro. Jepuni njerëzve atë që u takon. Ju kërkoni vetëm që mos të jeni në listën e zezë”, u shpreh Rama.
