Rigels Seliman
Aktivistja e njohur shqiptaro-amerikane, Evi Kokalari ka paralajmëruar zhvillime të forta në Shqipëri, duke theksuar ndikimin që administrata e re “Trump” mund të ketë në shkatërrimin e kupolës së korruptuar të pushtetit. Përmes një statusi në rrjetet sociale, zonja Kokalari ka zbuluar se nëse Richard Grenell, ish-diplomati amerikan, do të guxojë të merret me dosjen e Sali Berishës që është shpallur “non-grata” nga Departamenti Amerikan i Shtetit (DASH), atëherë sipas saj, do të shpërthejnë skandale që shqiptarët nuk i kanë imagjinuar kurrë. Aktivistja Kokalari ka lënë të kuptohet se këto zhvillime mund të ndikojnë edhe në funksionimin e institucioneve të drejtësisë, si Prokuroria e Posaçme (SPAK), duke paralajmëruar telashe (ditë të zeza) për këdo që është përfshirë në afera korruptive dhe kriminale në Shqipëri. Ajo ka paralajmëruar se ky proces mund të sjellë një ndryshim të madh në peizazhin politik dhe të fuqizojë luftën kundër korrupsionit. Në këtë kuadër, paralajmërimi i zonjës Kokalari ka shtuar edhe më shumë ankthin në skenën politike shqiptare.
Mesazhi i Kokalarit
Pra përmes kësaj deklarate të fortë dhe plot tension, aktivistja Evi Kokalari si mbështetësja më e madhe e platformave konservatore, ka paralajmëruar zhvillime të fuqishme dhe ndryshime të thella në Shqipëri, që lidhen me ndikimin e administratës “Trump” dhe hetimet për korrupsionin në vend. Sipas Kokalari, administrata amerikane, do të luajë një rol kyç në “shkatërrimin” e kupolës së korruptuar që ka sunduar Shqipërinë për më shumë se dy dekada. Ajo e paralajmëron këtë si një proces që mund të sjellë pasoja të mëdha për shumë figura të fuqishme politike dhe biznesi në vend. Një nga pikat më të nxehta që Kokalari ka ngritur është lidhur me dosjen e Sali Berishës në Departamentin e Shtetit Amerikan (DASH). Ajo ka theksuar se nëse Richard Grenell, ish-diplomati i njohur dhe një nga përfaqësuesit e administratës Trump, do të guxojë të afrohet dhe të merret me këtë dosje, do të shpërthejnë “skandale që shqiptarët nuk i kanë imagjinuar kurrë”. Për më tepër, Evi Kokalari ka aluduar se ky proces mund të ketë ndikim edhe në funksionimin e institucioneve të drejtësisë, sidomos SPAK-ut. Ajo ka sugjeruar se, ndërsa SPAK (Shqipëria Prokuroria e Posaçme) është paraqitur si një institucion që po lufton korrupsionin, presioni ndërkombëtar dhe hetimet e mundshme nga autoritetet amerikane mund të krijojnë zhvillime të papritura, përfshirë dhe ndërhyrje të mundshme në hetimet që kanë të bëjnë me figura të larta politike. Sipas Kokalari, nëse SPAK do të përballet me presion nga jashtë, mund të shfaqen dhe ndërrime të mundshme brenda tij, duke i dhënë një dimension të ri luftës kundër korrupsionit.
Reagimi i plotë i aktivistes Evi Kokalari në “Facebook”
“Jam Evi Kokalari unë, o budallenj!! Kë menduat ju se do tërhiqnit zvarrë, o budallenj? J’u solla Grenellin dhe j’u hodhët si të babëzitur, o të gjorë, duke menduar se do me hiqnit mua qafe se j’u ekspozova korrupsionin brenda dhe jashtë ‘rithemelimit.’ J’u thashë më keni nënvlerësuar shumë. Ju keqkuptoni mbështetjen që ju dhashë me naivitetin njerëzor. Por naiviteti është sinqeritet, nuk është budallëk dhe me shumë sinqeritet ju ndihmova, por jeni të vobektë nga shpirti dhe nga mentaliteti! I keni bërë shumë dëm vetes! Shumë! Ajo ndihmë që ju dhashë do t’ju çonte në fitore në 2025. Tashti duhet të ikni dhe ju me Ramën. S’ka më kthim mbrapa! Seriozisht menduat që Trump do t’ju lejonte ti Balkanizonit administratën po të dinte vërtet çfarë bëhej tek ju? Trump është tashmë i qartë, oh të gjorët ju që ju iku dhe McGonigal 2.0 Ky është vetëm fillimi! Ju a premtoj me dorë në zemër – ai korrupsion tek ju do marrë fund dhe e gjithë kupola do të shkatërrohet plotësisht, duke marrë dhe mediat me vete. Ja u thashë, nga unë hytë në rrethet e Trumpit, dhe nga unë do dilni! Dhe kjo dalje sot ishte masive!!! Dhe ju lutem, për çfarë heqje ‘non-gratash’ flisni nëpër studio televizive? Asgjë nuk hiqet për sa kohë që dosjet e SPAK mund ti kalojnë DASH-it, nëse s’janë këtu tashmë. Nëse Grenell apo kushdo tjetër guxon t’i afrohet dosjes së Berishës në DASH, do plasin skandale që si keni imagjinuar ndonjëherë. Dhe dy fjalë për Edi Ramën: Shoku yt Jared Kushner, sigurisht donte Grenell si Sekretar Shteti. Trump nuk dëgjoi as Ivankën dhe as Jared, kështu që pozicioni yt me administratën Trump nuk është i fortë fare siç mund te pretendosh ti, dhe nëse firmos aferën e Sazanit, siç kam thënë më parë, do bëj kallzim në SPAK dhe do ja kaloj atë kallzim dhe Senatit Amerikan që po investigon Jared Kushner për këtë aferë. Besoj tashmë i kuptoni aftësitë e mia, por më tepër, faktin që as më bleni dot, dhe as më shisni. cc: Sali Berisha & etal, Edi Rama & etal”, shkruan Kokalari.
