Argjentina është një “bombë me sahat”, protestat kanë shpërthyer në gjithë vendin, ja reformat që kanë nxitur trazira

Fondi Monetar Ndërkombëtar (FMN) i ka hapur rrugën Argjentinës për të marrë 800 milionë dollarë për të ndihmuar rimëkëmbjen e saj ekonomike, duke njoftuar se programi i huadhënies është “në rrugën e duhur”.Argjentina ka një program prej 44 miliardë dollarësh me FMN-në, i cili përfshin objektiva ekonomike që lidhen me rritjen, inflacionin dhe rezervat valutore. Në një deklaratë të së enjtes, FMN deklaroi se Bordi Ekzekutiv i saj përfundoi shqyrtimin e tetë të asaj marrëveshjeje. “Pas përfundimit të rishikimit, Bordi Ekzekutiv vlerësoi se programi është në rrugën e duhur, me të gjitha kriteret sasiore të performancës të përmbushura deri në fund të marsit 2024”, njoftoi FMN. Ai shtoi gjithashtu se ruajtja e këtij progresi do të kërkojë përmirësimin e cilësisë së rregullimit fiskal, një kuadër të  ri të përmirësuar të politikës monetare dhe valutore dhe zbatimin e reformave për rritje. Qeveria argjentinase ka njoftuar se do të nisë bisedimet me FMN-në për një program të ri. Miratimi i FMN-së vjen pasi presidenti argjentinas Javier Milei , i cili mori detyrën në dhjetor, zbatoi reforma gjithëpërfshirëse fiskale dhe frenoi ndjeshëm shpenzimet e qeverisë për të trajtuar inflacionin treshifror, një ekonomi në tkurrje dhe rezerva negative valutore. Ndryshimet që ai prezantoi ndihmuan Argjentinën të rivendoste rezervat e varfëruara të këmbimit valutor, të arrinte teprica fiskale në fillim të vitit dhe të stabilizonte monedhën e saj, peson. Megjithatë, qeveria atje përballet me sfida, pasi ekonomia po ndalet dhe nivelet e varfërisë rriten. Të mërkurën, protestat shpërthyen për reformat e mëtejshme që parashikojnë shkurtime buxhetore.